Die twee laerskoolkinders wat in ‘n fratsongeluk uit ‘n springkasteel geval het, is uit die hospitaal ontslaan nadat hulle ernstig beseer is.
Dit kom nadat die springkasteel waarop hulle was deur ’n rukwind in die lug tydens die Laerskool Protearif in Krugersdorp se Proteafees opgeswiep is.
Die kasteel het glo ’n hoogte van tót drie verdiepings bereik vóór die kinders uitgeslinger is.
Dis onduidelik of die toue of ankermeganismes deur die wind afgeruk is en of die kasteel nooit vasgemaak was nie.
Die saak is na die departement van basiese onderwys verwys vir verdere ondersoek.
Die Citizen berig dat een kind ’n skedelfraktuur opgedoen en die ander ’n arm gebreek het, maar dit kon nie bevestig word nie.
Die skool het op sy Facebook-blad geskryf dat die nodige trauma-berading aan die betrokke twee kinders sowel as ander leerlinge gebied is. “Wat ‘n voorreg dat Laerskool Protearif, altyd kan staatmaak op ons ouers én die breër Krugersdorp- gemeenskap se ondersteuning.”
Intussen is die persoon wat in 2021 ‘n springkasteel in Australië bedryf het toe ses kinders dood is, Vrydag (Australiese tyd) onskuldig bevind op alle aanklagte teen haar.
Soos met die voorval by die Laerskool Protearif, het ‘n rukwind die springkasteel by ‘n gesinsdag van die Hillcrest Laerskool in Devonport, Tasmanië in die lug opgelig, waarna vyf van die kinders sowat 10 meter ver geval het.
Die sesde kind is dood toe die motor van die springkasteel hom teen die kop getref het.
Rosemary Anne Gamble, die eienaar van die springkasteel-maatskappy, Taz Zorb is onskuldig bevind op aanklagte dat sy nalatig was en nie die nodige veiligheidsmaatreëls gevolg het nie.
Die hof het aangevoer dat Gamble niks meer kon doen om die voorval te verhoed nie. Die kinders wat dood is, was tussen 11- en 12 jaar oud. Ander kinders is ook beseer.
Video: Hein Kaiser, The Citizen.
