14 Februarie 2022
Die LUR vir onderwys in Gauteng, Panyaza Lesufi besoek vanoggend die Hoërskool Jan Viljoen in Randfontein na ‘n bakleiery Vrydag tussen leerlinge van die skool.
Lesufi meen dié geveg was rasgedrewe. Hy sê geweld het geen plek in skole nie en sal daarom met die skool se bestuur vergader.
Intussen moes die polisie skokgranate vanoggend inspan toe leerlinge klippe na polisiebeamptes gegooi het.
Lede van die EFF, ANC, ouers en leerlinge van ander skole het ook opgeruk. Leerlinge van die Hoërskool Jan Viljoen het ook vanoggend uit hulle klasse gegaan om te betoog.
Die beheerliggaam en bestuur van die skool het op sy Facebook-blad gesê dat hulle nié die gedrag goedkeur nie. “Die skool sowel as die beheerliggaam, is reeds die hele naweek besig om die voorval te ondersoek. Ons verseker u dat die skuldige partye gestraf sal word in terme die SA Skolewet en die skool se gedragskode.”
