4 Augustus 2023
Die hoof van atletiek in Somalië is geskors nadat ‘n video wyd op sosiale media versprei is waarin ‘n 20-jarige atleet langer as 21 sekondes geneem het om ‘n 100 meter wedloop op die Wêrelduniversiteitspele te voltooi.
Nasra Abukar Ali het laaste gekom in die wedloop wat in China gehou is. Haar tyd was byna twee keer stadiger as die wenner, Gabriela Mourão van Brasilië. Volgens die nuusdiens, Aljazeera was Ali se tyd so stadig dat sy vir die grootste deel van die resies nie op kamera gesien kon word nie.
Somalië se minister van sport, Mohamed Barre Mohamud sê ondersoeke het daarop gewys dat Ali géén agtergrond as ‘n atleet het nie.
Die voorsitter van atletiek in Somalië, Khadijo Aden Dahir is geskors nadat dit aan die lig gekom het dat sy Ali ingeskryf het, wat ook haar niggie is. Volgens Mohamud sal hulle regstappe neem. Volgens hom is daar ook geen Somali University Sports Association soos wat Dahir op die aansoekvorms aangedui het nie.
