28 September 2023
Die bestuurder van ’n Toyota Tazz word deur sosialemediagebruikers as ’n held beskou nadat sy ’n rower agternagesit het – wat haar handsak gesteel het – en hom in ’n besige straat in Durban met haar motor raakgery het.
Kringtelevisiebeeldmateriaal van die voorval wys hoe twee mans haar voertuig by ‘n valhek langs ‘n vulstasie nader waar hulle die bestuurder se deur oopmaak en haar handsak steel.
Hul poging om die motor te steel word gefnuik toe ‘n ander motoris hulle probeer omry, waarna hulle op die vlug slaan.
Terwyl een in ‘n wagtende motor spring, sit die vrou die ander een agterna en ry oor ‘n middelmannetjie waarna sy die verdagte tref.
Sosiale media-gebruikers sê hulle sal die vrou ten alle koste verdedig as sy aangekla word omdat sy die dief raakgery het.
Die polisie se luitenant-kolonel Nqobile Gwala sê ‘n 28-jarige verdagte is aangekeer en sal binnekort in die hof verskyn.
Die gesteelde handsak is terug gevind.
Video: Yusuf Abramjee
