Waarskuwing die videos kan sensitiewe kykers ontstel.
8 Junie 2022
AfriForum se privaatvervolgingseenheid het nóg sukses gesmaak nadat Jaco Swart – ‘n oortreder wat van aanranding met die doel om ernstig te beseer aangekla is – gistermiddag in die Pretoria-Noord streekhof skuldig bevind is.
Swart is ‘n boete van R20 000 opgelê, tesame met drie jaar gevangenisstraf – wat vir vyf jaar opgeskort is – nadat hy skuldig gepleit het.
Die vervolgingseenheid het die slagoffer – Swart se vervreemde vrou, Nicoleen – verteenwoordig kragtens ‘n waaksaamheidsopdrag.
Kringtelevisie-beeldmateriaal van hul besigheidsperseel wys hoe Swart sy vrou in 2018 slaan, stoot en skop. Van hierdie wrede aanvalle het voor die paartjie se twee kinders plaasgevind.
Voordat die eenheid betrokke geraak het, is die saak van die rol geskrap en Swart se vervolging gestaak.
“Alhoewel ek teleurgesteld is in die vonnis wat die hof opgelê het, is ek verheug oor die skuldigbevinding. Dit stuur ’n sterk boodskap uit aan vrouens dat hulle moet opstaan teen geslagsgebaseerde geweld en dat daar altyd ’n gewillige oor is wat bereid is om te luister,” het Nicolene na die uitspraak gesê.
Die kringtelevisie-beeldmateriaal – https://we.tl/t-Mf92Jh6kR7.
