28 Oktober 2022
Die minister van polisie Bheki Cele sê daar is geen rede vir Suid-Afrikaners om bekommerd te wees oor ‘n terreur-waarskuwing deur die Amerikaanse ambassade nie.
Cele is tans by die Moses Mabhida stadion in Durban waar die Zoeloe-koning, Misuzulu kaZwelithini môre tydens ‘n seremonie ‘n sertifikaat van herkenning sal ontvang. Cele het tydens ‘n onderhoud gesê dat daar – volgens die Suid-Afrikaanse Polisie – geen bewyse van ‘n terreur-aanval is nie.
LEES OOK: SANDTON CITY SAL OOPBLY TE MIDDE VAN TERREUR-WAARSKUWING
Die Amerikaanse ambassade het Woensdag mense gewaarsku om nie die naweek groot byeenkomste by te woon nie omdat hulle inligting van ‘n terreur-aanval in Sandton ontvang het. Ook die Britse regering het ‘n waarskuwing uitgereik.
Cele sê die polisie is gereed vir enige aanvalle, maar meen daar bestaan geen bewyse nie. Hy sê selfs al was daar nie ‘n terreur-waarskuwing nie, is die polisie gereed om enige voorval te beveg en om Suid-Afrikaners veilig te hou.
LEES OOK: METROPOLISIE OP ‘N HOË GEREEDHEIDSGRONDSLAG TE MIDDE VAN TERREUR-WAARSKUWING
Die minister sê ná Julie 2021 se onluste het die land talle soortgelyk waarskuwings ontvang, maar die polisie het bewys dat hulle dit ernstig kan opneem.
