16 Januarie 2024
Die Tshwane-metropolisiedepartement het met ‘n ondersoek begin nadat twee van sy beamptes en ‘n verdagte – wat hulle pas by ‘n padblokkade in hegtenis geneem het – deur ‘n voertuig van die metropolisie raakgery is.
‘n Woordvoerder van die metropolisie, senior superintendent Isaac Mahamba, sê die voorval het die afgelope Vrydag in Hammanskraal plaasgevind.
Selfoonbeeldmateriaal – wat op die sosiale media die rondte doen – wys hoe twee wetstoepassers weerskante van die verdagte loop toe die voertuig hulle tref.
Mahamba sê die verdagte en die beamptes is lig beseer en na behandeling dieselfde dag uit die hospitaal ontslaan.
