4 Julie 2024
‘n 19-jarige man is in hegtenis geneem nadat hy na bewering sy ouma in Kraaifontein in die Wes-Kaap aangerand het.
Dit volg nadat ‘n video aan die lig gekom het waarin gesien kan word hoe ‘n jong man ‘n bejaarde vrou aanrand. Die polisiewoordvoerder, brigadier Athlenda Mathe sê die voorval het glo in Junie plaasgevind.
Volgens Mathe wou die familie aanvanklik nie die polisie se hulp aanvaar nie.
Sy sê polisiebeamptes het die bejaarde slagoffer in ‘n hospitaal gevind – waar sy vir ‘n onverwante siekte behandel word.
Volgens Mathe was die vrou egter nie bereid om ‘n klag teen haar kleinseun te lê nie.
Mathe sê die polisie het na aanleiding van die video ingegryp en ‘n klag namens die slagoffer aanhangig gemaak.
