23 Augustus 2022
‘n Hoewe-bewoner van Kameeldrift-Wes – buite Pretoria – het ter nouer nood aan die dood ontkom nadat hy vermoedelik Sondagaand deur drie gewapende aanvallers in sy werkswinkel oorrompel is.
Die slagoffer het kalm gebly en kon daarin slaag om die aanvallers te verjaag. In ‘n video – wat wyd op die sosiale media gedeel word – kan gesien word hoe die verdagtes die inwoner se werkswinkel betree.
Na ‘n kort skermutseling kry die slagoffer ‘n vuurwapen in die hande waarna hy op die booswigte losbrand waarna hulle op die vlug slaan.
Volgens Bianca Burger, die skakelbeampte van die Groenlig-gemeenskapsprojek in Kameeldrift-Wes, het die slagoffer – wat nie sy naam genoem wil hê nie – een van die verdagtes raakgeskiet.
‘n Bloedspooor is in die veld gevind waar owerhede op ‘n mes en ‘n klapmus afgekom het.
Niemand is nog in hegtenis geneem nie en die polisie is opsoek na drie verdagtes.
