1 Mei 2022
Die leier van die DA, John Steenhuisen het vroeër vanmiddag in ‘n plasing op sy Twitter-rekening bevestig dat hy in Lwif in Oekraïne aangekom het waar hy vir ses dae sal toer.
Steenhuisen sê Suid-Afrika kan nie meer net terug sit en maak asof die situasie in Oekraïne niks met ons te doen het nie. Hy sê die doel van die besoek is om eerstehandse ervaring te kry van die situasie in die land sedert dit op 24 Februarie deur Russiese troepe binnegeval is.
Hy sê hy sal binne die volgende week goewerneurs, burgemeesters, studente, gewone landsburgers en vlugtelingekampe besoek.
Volgens Steenhuisen is so ‘n besoek die enigste manier om fopnuus te skei van wat werklik in Oekraïne aan die gang is. Hy het verder benadruk dat die situasie tussen die twee lande nie beperk is tot Europa nie omdat die nagevolge ‘n wêreldwye uitwerking het.
