28 Desember 2021
Die Johannesburgse Metropolisie het ‘n beroep op mense wat naby die Jukskeirivier woon gedoen om hul huise te ontruim.
Gauteng het die afgelope dae onder swaar reënval gebuk gegaan en die watervlak in die rivier het aansienlik gestyg.
Geïsoleerde donderstorms word weer vandag vir die gebied voorspel wat die moontlikheid sterk maak dat die rivier oor sy walle sal bars.
In die Vrystaat en die Noord-Kaap is die Oranjerivier vir die tweede maal vanjaar in vloed danksy die goeie reën wat sedert November in die gebied val. Die Augrabies waterval is tans ‘n skouspel.
Die Suid-Afrikaanse Weerdiens (SAWS) verwag dat die heersende La Nina-weerstelsel vir die res van die seisoen bo-gemiddelde reënval in al die somer reënvalstreke sal meebring en dat vloede ook in die Vaalrivier sal voorkom.
