28 September 2023
‘n Groot aanhanger van die sepie, 7de Laan het ‘n griefskrif by die kantore van die Suid-Afrikaanse Uitsaaikorporasie (SAUK) in Johannesburg ingedien waarin hy en sy ondersteuners eis dat die sepie nié tot ‘n einde kom nie.
Jermaine Christens is die stigter van die Facebook-groep, 7de Laan my Nou wat gestig is nadat die SAUK aangekondig het dat die sepie in Desember vanjaar tot ‘n einde gaan kom.
Die SAUK het toe gesê dat dit nie meer finansieel haalbaar is om die sepie op die lug te hou nie. Christens, wat van die Wes-Kaap gekom het om die griefskrif in te dien, meen hy is nie tevrede met die redes wat die SAUK verskaf het nie.
‘n Reuse aanhanger van 7de Laan, Itumeleng Moalafi sê hy kyk die sepie al van 2005 af, en dat dit weens die sepie is waar hy geleer het om Afrikaans te praat en te verstaan.
Die waarnemende groep-direkteur vir korporatiewe sake en Bemarking, Mmomi Seapolelo wou nie vrae beantwoord nie, maar sê sy neem kennis van die griefskrif en dat die SAUK dit nou sal deurwerk. Christens sê hulle gee die SAUK-bestuur 10 dae om te reageer.
Video – Jermaine Carelse (in oranje) en Itumeleng Moalafi (in rooi)
