10 Februarie 2022
Die polisie in Wellington, in Nieu-Seeland, het meer as 120 betogers in hegtenis geneem nadat hulle met die beamptes voor die parlementsgebou slaags geraak het.
Die betogers – wat ‘n weersin in die land se benadering tot verpligte inenting teen Covid-19 het – het sedert Dinsdag buite die gebou gekampeer om hulle misnoë met die huidige inperkingsregulasies te kenne te gee.
Die polisie het vanoggend opgetree nadat ‘n paar honderd bittereinders geweier het om die terrein te verlaat.
Enkele beserings is onder albei groepe aangemeld.
Nieu-Seeland handhaaf van die strengste beperkings en inperkings wêreldwyd in ‘n poging om die voorkoms van die virus in dié eilandstaat te probeer beheer.
