31 Maart 2021
Die polisie in KwaZulu-Natal ondersoek twee aanklagte van moord nadat ‘n paartjie gister op ‘n grondpad in hulle bakkie in die Pietermaritzburg-omgewing doodgeskiet is.
Volgens die polisiewoordvoerder, kolonel Thembeka Mbele het die paartjie omstreeks half 11 gisteroggend hulle huis in Raisethorpe verlaat toe hulle deur glo ‘n onbekende aantal verdagtes in ‘n lokval gelei is.
Sy sê verskeie skote is afgevuur. Die woordvoerder van Netcare 911, Shawn Herbst sê met paramedici se aankoms op die toneel het die paartjie geen teken van lewe getoon nie.
Hulle is albei op die toneel dood verklaar. Die polisie ondersoek die omstandighede van die voorval.
