6 Augustus 2024
Die departement van gesondheid sê byna 120 000 dogters tussen die ouderdom van 15- en 19 jaar het in die 2023/24-boekjaar geboorte geskenk by openbare gesondheidsorginstellings.
Volgens die departement se woordvoerder, Foster Mohale het nagenoeg 2 700 dogters tussen 10 en 14-jaar oud in dié tyd geboorte geskenk.
Mohale sê die syfers sluit nie geboortes by privaat-gesondheidsorginstellings in nie en dat die syfers waarskynlik hoër sal wees wanneer dit bygereken word. In die ouderdomskategorie van 10 tot 14 jaar het 610 meisies in KwaZulu-Natal geboorte geskenk.
430 van dié geboortes was in Gauteng, 395 in die Oos-Kaap, 375 in Limpopo, 293 in Mpumalanga, 286 in die Wes-Kaap, 151 in Noordwes, 106 in die Vrystaat en 70 in die Noord-Kaap.
1 226 swangerskappe van dogters in die jonger ouderdomsgroep en 19 246 in die ouer ouderdomsgroep is voortydig beëindig.
Die meeste swangerskappe in die ouer ouderdomsgroep (15-19) is ook in KwaZulu-Natal aangemeld met 30 478 swangerskappe. In Gauteng het 19 406 tieners geboorte geskenk, gevolg deur 16 262 in Limpopo.
