14 Oktober 2024
Die onlangse sterftes en hospitalisering van ʼn groot aantal kinders wat vermoedelik giftige kos van spaza-winkels en straatverkopers geëet het, is aanduidend van die swak polisiëring en regulering van bestaande wette en verordeninge.
Dít is die mening van die VF Plus-LP en hoofwoordvoerder oor gesondheid, Philip van Staden.
Aanvanklik is die meeste gevalle in Gauteng aangemeld, maar het intussen uitgekring nadat soortgelyke gevalle onlangs in Limpopo en KwaZulu-Natal aangemeld is.
Van Staden meen munisipale wetstoepassing moet met behulp van die provinsiale- en nasionale regering versterk word. Volgens hom skitter plaaslike gesondheidsinspekteurs in hul afwesigheid wanneer dit kom by die straatverkope van voedsel.
“Dit terwyl restaurante, kettingwinkels en formele wegneemete-handelaars aan streng wetgewing en regulasies moet voldoen om ʼn lisensie te bekom en handel te dryf.”
