25 Junie 2021
Die waarnemende minister van gesondheid Mmamaloko Kubayi-Ngubane het vanoggend ‘n mediakonferensie gehou oor die regering se vordering teen die Covid-19-pandemie asook die inentingsprogram.
Volgens haar sal die gesondheidsdepartement weer Dinsdag met die koronavirusbevelsraad vergader waarna hul sal besluit oor enige moontlike verdere inperkingsmaatreëls.
Sy sê hulle het lesse geleer uit die ander vlae en sal dus met die bevelsraad vergader.
Volgens Kubayi-Ngubane is die meeste nuwe Covid-19-gevalle weer gister in Gauteng aangemeld. Sy sê die departement is onseker of die infeksies so hoog in die provinsie is weens ‘n moontlike nuwe variant of omdat mense hulle bloot net nie steur aan die maatreëls nie.
Intussen het sy ook bevestig dat die registrasieproses vir mense ouer as 50 jaar op 1 Julie sal begin. Dié groep sal na verwagting vanaf 15 Julie teen Covid-19 ingeënt word.
Tot dusver is meer as 2,5-miljoen mense in Suid-Afrika teen die virus ingeënt.
