19 Februarie 2024
Die VF Plus het ná ʼn oorsigbesoek van die Emfuleni-plaaslike munisipaliteit se finansiële komitee aan ʼn stormwaterstelsel-projek, versoek dat dit tydelik gestaak word weens swak vakmanskap.
Die VF Plus-raadslid in die Emfuleni-plaaslike munisipaliteit, Gerda Senekal sê rolspelers het die bouperseel besoek omdat die betrokke kontrakteur al in Mei verlede jaar die projek moes afhandel.
“Die kontrakteur het twee jaar gelede teen ʼn bedrag van R8-miljoen begin om ʼn nuwe stormwaterstelsel te bou langs Westinghouselaan in Vanderbijlpark,” verduidelik Senekal.
Sy sê die stormwaterkanaal moet ook met betondeksels bedek word wat opgelig kan word om dit skoon te maak. Die kontrakteur, wat reeds R4 miljoen vir die werk ontvang het moet ook eersdaags met die herseëling van die pad begin.
Senekal sê tydens die oorsigbesoek is gevind dat van die nuwe betondeksels gekraak is en die handvatsels van dun metaal gemaak is. Volgens haar behoort die kontrakteur voor die munisipale raad te verskyn om te verduidelik waarom die werk van só ‘n swak gehalte is.
