15 September 2022
Die minister van polisie, Bheki Cele sê 32 ontvoerings is tussen Maart en September vanjaar by die Wes-Kaapse polisie aangemeld.
Tussen 5- en 11 September is minstens 80 mense in die provinsie vermoor. Cele het vanoggend ‘n mediakonferensie gehou waartydens hy die Wes-Kaapse misdaadstatistiek bekend gemaak het.
Volgens hom het kontakmisdade soos moord, poging tot moord, seksuele oortredings en aanranding tussen April en Junie toegeneem. Cele sê die Nyanga-polisiekantoor is nou nommer een op die lys van polisiekantore waar die meeste kontakmisdade aangemeld word.
Die Kaapse Vlakte is die gebied waar die meeste moorde aangemeld word, weens die feit dat veral bendegeweld hier voorkom.
Cele sê 15 mense is die afgelope tyd reeds vasgetrek in verband met ontvoerings, waarvan 5 die afgelope week reeds in die hof verskyn. 24 polisielede is tussen 1 April tot September in hegtenis geneem vir verskeie misdade.
11 hier van is korrupsie, vier is bedrog, vier is vir aanklagte vir afpersing en vier is vir dwarsboming van die gereg.
