22 November 2021
Die DA, VF Plus, ActionSA, die ACDP, die UDM en Cope sal vandag nog op nommer 99 probeer om samesprekings te voer oor ‘n moontlike koalisieooreenkoms in die Johannesburgse-metro.
Dit volg nadat die DA Saterdag aangekondig het dat hy nie ActionSA se burgemeesterskandidaat in Johannesburg sal steun nie, omdat hulle op die EFF se steun sal moet reken om ‘n minderheidsregering in die goudstad in te stel. Die DA sal sy eie burgemeesterskandidaat, Mpho Phalatse verkiesbaar stel.
Die voorsitter van die veelparty-koalisiegesprekke, dr. Corné Mulder sê intussen die DA se besluit om nie ActionSA te steun in Johannesburg nie, plaas nie ander moontlike koalisieooreenkomste tussen die partye in gedrang nie.
LEES OOK: KOALISIEREGERING IN TSHWANE-METRO IN DIE WEEGSKAAL
Mulder sê die partye is almal verantwoordelik om te weet dat die omstandighede verskil en dat mense nie koalisies in gedrang sal bring in ander plekke waar daar ’n belang van daardie gemeenskappe is nie.
Die ANC het intussen sy koalisie-onderhandelinge afgehandel en dié party sal teen môre kandidate in meer as 200 metro- en munisipale raadsvergaderings landwyd as burgemeesters en ander ampsdraers verkiesbaar stel.
Mpo Moerane, wat tot 1 November burgemeester in Johannesburg was, sal weer as die ANC se burgemeesterskandidaat verkiesbaar gestel word.
Mzwandile Masina sal weer die burgemeesterskandidaat wees vir Ekurhuleni, terwyl Frans Boshielo benoem is as die kandidaat vir Tshwane.
Stem vir die Aitsa’s
