7 Julie 2022
Die vakbond Solidariteit het ‘n beroep op kleinskaalse kragopwekkers gedoen om in hul honderde aansoek te doen vir opwekkingspermitte.
Die vakbond het vanoggend tydens ‘n mediakonferensie gesê dat grootskaalse toetrede tot kragopwekking deur kleinskaalse opwekkers nodig is om die land se kragkrisis op te los.
Die bestuurshoof van Solidariteit, dr Dirk Hermann het tydens die konferensie ‘n vyf-punt aksieplan aangekondig om toe te sien dat die probleem onder die loep geneem word.
Hy het ook aangekondig dat hy self beplan om deur die ontwikkelingsmaatskappy, Kanton by kragopwekking betrokke te raak.
“Ons lede se werk en inkomste word op ʼn groot skaal deur die kragkrisis vernietig. Die grootste daad van werkbeskerming wat ons nou kan verrig, is om alles moontlik te doen om krag in die stelsel te kry,” sê Hermann.
Hy meen as die privaat sektor hierdie geleentheid aangryp, kan dit ʼn kragrevolusie veroorsaak.
