2 Maart 2022
Die kleinseun van die vermoorde Susanna Kilmister (68), wat se liggaam Maandag op haar kleinhoewe naby Nelspruit (Mbombela), in Mpumalanga, aangetref is, staan tereg op haar moord.
Die 25-jarige, JJ Peters, het vandag vlugtig in die Mbombela landdroshof verskyn op dié aanklag, asook klagte van regsverydeling en opsetlike saakbeskadiging.
Volgens die Nasionale Vervolgingsgesag (NVG) se Monica Nyuswa, het Peters en sy ouma – wat saam op die hoewe gewoon het – glo ‘n uitval gehad wat na bewering tot die moord gelei het.
Die saak teen Peters – wat op die toneel in hegtenis geneem is – is tot 10 Maart uitgestel wanneer hy waarskynlik om borgtog sal aansoek doen.
