29 Junie 2023
Die Grondwethof het die parlement 24 maande tyd gegee om artikel 40 van die Kinderwet – wat diskrimineer op grond van huwelikstatus en seksuele oriëntasie – te wysig.
Vandag se uitspraak deur die land se hoogste hof is belyn met ‘n vroeëre uitspraak van die hooggeregshof wat die weg gebaan het vir lesbiese paartjies om erken te word as gelyke ouers van ‘n kind wat deur kunsmatige inseminasie verwek is.
Die uitspraak verklaar dat Artikel 40 van die wet teenstrydig is met die Grondwet in die mate dat dit nie die woorde “permanente lewensmaat” ná die woorde “eggenoot” en “man” ingesluit het nie.
Artikel 40 van die Kinderwet – wat handel oor die regte van ‘n kind wat verwek word by wyse van kunsmatige bevrugting – maak slegs voorsiening vir ‘n situasie waar ‘n man en ‘n vrou – getroud of nie – ‘n kind verwek, en nie vir gevalle waar twee vroue in ‘n toegewyde verhouding is nie.
Volgens die uitspraak het tradisionele idees van gesin en ouerskap revolusionêre verandering ondergaan.
