12 Desember 2022
Die Nasionale Vereniging van Skoolbeheerliggame, die NASGB, sê kinders moet nie toegelaat word om selfone na skole te bring nie.
Dit volg nadat die departement van basiese onderwys met ‘n ondersoek begin het ná bewerings van bedrog in die matriekeksamen.
Na bewering het die leerders onderwysers tot R1500 betaal om deel te word van ‘n groep op WhatsApp waar antwoorde verskaf is terwyl die leerlinge in die eksamenlokaal sit.
Die hoofsekretaris by die Nasionale Vereniging van Skoolbeheerliggame, Matakanye Matakanye, sê hulle stel voor dat skole ‘n streng selfoonbeleid moet instel.
Hy sê daar moet ‘n duidelike beleid wees wat sê geen kind mag ‘n selfoon by die skool inbring nie.
