17 Januarie 2022
AfriForum se privaatvervolgingseenheid sê hy is geskok deur ‘n verwikkeling vroeër vandag in een van die kindermishandelingsake in Brits waarby die eenheid tans betrokke is.
Dit volg nadat die hof vandag weer die saak uitgestel het teen twee mans, asook die ma van ’n jong dogtertjie. Die beskuldigdes staan tereg op verskeie klagtes van verkragting van die dogtertjie wat ten tyde van die pleging van die beweerde misdaad in 2018 vier jaar oud was.
Die hoof van AfriForum se privaatvervolgingseenheid, advocaat Gerrie Nel sê die uitstel volg omdat die streeklanddros volgens die hof siek is en niemand skynbaar in haar plek kan waarneem totdat sy herstel het nie.
Die saak kon ook nie tot Februarie uitgestel word nie omdat die streeklanddros waarskynlik na Ga-Rankuwa oorgeplaas gaan word en daar nog geen nuwe aanstelling gedoen is nie.
“Dit blyk dat die Staat se sogenaamde verbintenis tot die bevegting van geweld teen vroue en kinders nou finaal lippediens geword het. Hóé kan die departement van justisie en die howe toelaat dat hierdie saak van gruwelike kindermishandeling, wat as gevolg van die onbeholpenheid van die NVG reeds so lank sloer, nie kan voortgaan nie bloot omdat daar nie ’n hof beskikbaar is nie en geen verdere reëlings getref is nie,” sê Nel.
’n Voorlopige voorverhoordatum is nou vir 23 Maart 2022 vasgestel.
