11 Junie 2021
‘n Graad 7-leerling aan ‘n laerskool in KwaZulu-Natal is dood nadat hy ‘n bakkie met ‘n ontsmettingsmiddel aan die brand gesteek en dit in sy gesig ontplof het.
Die 12-jarige leerling van Effingham Heights Primary School in KwaZulu-Natal het glo probeer om ‘n Tik-Tok video na te boots toe die ongeluk gebeur het.
Tik-Tok is ‘n sosiale media platform waarin mense ‘n verskeidenheid videos kan oplaai.
‘n Woordvoerder van die provinsiale onderwysdepartement, Muzi Mahlambi sê die voorval het nie by die skool plaasgevind nie.
Volgens hom is die kind gisteraand dood weens ernstige brandwonde. Mahlambi het namens die onderwysdepartement sy medelye met die familie betuig.
