31 Januarie 2023
Die vakbond, Solidariteit meen om ‘n ramptoestand af te kondig weens die voortslepende kragkrisis sal meer skade aanrig as wat dit goed doen.
Volgens Solidariteit is dit eerder die regering se onvermoë om hul huidige magte aan te wend wat tot die krisis gelei het en sal ʼn ramptoestand weereens die deur vir grootskaalse korrupsie en bedrog oopmaak.
Die hoof van Solidariteit se navorsingsinstituut, Connie Mulder voer aan dat dit waansinnig is om die regering met die magte van ʼn ramptoestand te vertrou wanneer hul wanbestuur juis die oorsaak van die ramp is.
LEES OOK: JOHN STEENHUISEN SÊ DIE REGERING IGNOREER KENNERS SE VOORSTELLE OM KRAGKRISIS OP TE LOS
Die DA het intussen in reaksie op die moontlike afkondiging van ‘n ramptoestand gesê dit moet slegs geld vir die energiesektor en Eskom. Die party eis dat daar volle parlementêre oorsig is oor die moontlike maatreëls wat in plek gestel sal word.
Die DA se Kevin Mileham sê indien die ramptoestand reg ingestel word, sal dit Eskom in staat stel om enige struikelblokke wat deur wetgewing en regulasies daar geplaas is, uit die weg te ruim.
Hy waarsku egter dat daar weer hulpbronne gesteel en geplunder gaan word, indien behoorlike oorsig nie plaasvind nie.
LEES OOK: “SUID-AFRIKANERS MOET SAAMWERK OM KRAGKRISIS OP TE LOS,” SÊ PRESIDENT IN SY NUUSBRIEF
Die leier van die VF Plus, dr. Pieter Groenewald sê daar mag nie ’n herhaling wees van die misbruik van mag soos wat met die Covid-19-ramptoestand beleef is nie.
“Die VF Plus sal as voorwaarde wil sien presies wat is die redes en die bepalings wat sal geld met so ’n ramptoestand. Dit is belangrik om te voorkom dat korrupsie nie weer soos met die Covid-19-ramptoestand op groot skaal plaasvind met fondse wat maklik toeganklik raak deur spesiale maatreëls nie.”
