10 Februarie 2022
‘n 42-jarige Vrou van Birchleigh-Noord in Kemptonpark is vanoggend voor haar man en haar 10-jarige tweeling by hul huis doodgeskiet.
Die gesin was in twee verskillende voertuie op pad werk- en skool toe, toe twee mans by die erf ingekom het en reguit na die vrou se motor gestap en haar doodgeskiet het. Die kinders, ‘n seun en ‘n dogter het dadelik uit hul pa se voertuig gespring om te help, maar sy is op die toneel dood.
Die aanvallers het in twee verskillende voertuie gevlug – die een in ‘n taxi en die ander in ‘n silwerkleurige voertuig.
Die polisiewoordvoerder, sersant Barbara Ferreira sê hulle ondersoek nog beeldmateriaal van veiligheidskamers, maar het reeds goeie leidrade gevind.
