1 Junie 2021
Die landbou organisasies Agri SA en TLU SA het kapsie gemaak teen die ANC se voorstel dat artikel 25 van die grondwet in geheel gewysig moet word, en nie net sekere gedeeltes nie.
Die ANC het voorgestel dat die rol van die howe in onteieningsdispute afgeskaal word, en om “staatsvoogdyskap oor grond” in te werk in die beoogde wysiging van die Grondwet om die onteiening van grond sonder vergoeding moontlik te maak.
Die ad hoc komitee se mandaat het gister tot ‘n einde gekom, maar daar sal vir nog ‘n verlenging van 30 dae gevra word, sodat die komitee sy werk kan voltooi.
AgriSA sê die voorstelle wat die ANC gemaak het is ’n resep vir ’n ekonomiese en humanitêre ramp en ’n uitnodiging vir grootskaalse korrupsie.
TLU SA sê die ANC probeer net die EFF paai voor die verkiesing.
