29 Desember 2023
Dit wil voorkom asof die verwoestende brande van die afgelope drie dae in die
Kamiesberg by Kamieskroon in die Noord-Kaap deur ’n tuinier wat tuinvullis
verbrand het, veroorsaak is.
Die brand is deur sterk wind aangevuur en het vinnig deur die Kamiesberg
versprei.
Volgens die burgemeester van die Namakwa-distriksmunisipaliteit, Mervin
Cloete, woed die brand nou hoofsaaklik in die berge waar dit ontoeganklik vir
voertuie en brandspanne is.
Brandweerspanne doen alles moontlik om die brande te blus.
Intussen staan brandspanne in Kaapstad ook nog bont om die brande daar onder beheer te hou. Dié metro se brand- en reddingsdienste het in minder as tien dae meer as eenduisend brande bestry. Die omgewings wat die ergste geraak is, is Simonstad, Glencairn, Melkbosstrand en Ottery.
Na die Simonstadbrande het die Dierewelsynsvereniging van Suid-Afrika en die Kaap die Goeie Hoop-dierebeskermingsvereniging 450 hektaar gefynkam vir beseerde diere. Foto’s van verbrande skilpaaie, slange en akkedisse – wat nie vinnig genoeg kon vlug nie – is in die media versprei.
Warm weer, sterk winde, droeër plantegroei en lae humiditeit in die Kaap is alles faktore wat die ideale omstandighede vir wegholveldbrande skep.
