21 Februarie 2024
Die DA sê hy gaan appelleer teen die uitspraak van die hooggeregshof in Pretoria waarin regter Aubrey Ledwaba die DA se aansoek – dat die ANC se kaderontplooiingsbeleid ongrondwetlik verklaar word – met koste van die hand gewys het.
Die leier van die DA, John Steenhuisen sê hoewel hulle die uitspraak respekteer, is hulle teleurgesteld daarin en stem hulle nie daarmee saam nie.
Steenhuisen sê anders as die hof voel hulle nie dat daar duidelike skeidslyne was tussen party en staat nie. Hy sê die DA glo dat die hof nié die verwoestende uitwerking van kaderontplooiing op Suid-Afrikaners in ag geneem het nie.
Volgens steenhuisen is kaderontplooiing ‘n kwaadwillige praktyk wat “elke deel van die staat besmet het.”
Die ANC se woordvoerder, Mahlengi Bhengu-Motsiri het buite die hof die uitspraak verwelkom. Sy sê sy neem kennis van die DA se voorneme om die saak te appelleer, en meen hulle het die volste reg om dit te doen.
Sy sê die ANC se kaderontplooiingsbeleid is in die openbare domein. Bhengu-Motsiri sê die ANC het bewyse dat die DA ook skuldig is aan kaderontplooiing.
