20 Junie 2023
Die departement van ontspanning en parke in Kaapstad sê weens die voortslepende reënval het die watertafelvlakke by sommige begraafplase uitermatig gestyg, wat moontlik ‘n invloed op bedrywighede op die kort termyn kan hê.
Volgens die burgemeesterskomiteelid vir gemeenskapsdienste en gesondheid, Patricia van der Ross, is dit nie ‘n nuwe verskynsel nie, maar het die afgelope weke se reën die toestand vererger.
Sy sê hulle werk daaraan om die situasie so goed moontlik te bestuur, maar dat dit noodwendig sekere gevolge gaan inhou.
Een daarvan is dat grafte in sommige gevalle vlakker gegrou word en dat ‘n tweede kis later nie bo-op die eerste begrawe sal kan word nie.
Sy het ‘n beroep op naasbestaandes, roubeklaers en begrafnisondernemers gedoen om geduldig te wees terwyl dié omstandighede voortduur.
