20 Mei 2021
Die ses maande oue baba, Ayden van Niekerk van Lydenburg in Mpumalanga is besig om stelselmatig bygebring te word nadat hy reeds vir twee weke in ‘n mediese koma is nadat hy aan ‘n stukkie biltong verstik het.
Sy ma, Estelle van Niekerk het aan Pretoria FM gesê dat Ayden op 6 Mei by sy ouma was. Sy het vir hom ‘n stukkie biltong gegee om te help met jeukerigheid, wat met tandesny gepaardgaan.
Hy bly bedags by sy ouma terwyl Estelle en haar man, Sarel werk. Volgens Estelle het ‘n stukkie van die biltong glo in Ayden se mond agtergebly en sowat ‘n halfuur later in sy keel afgegly toe sy pa hom neergelê het.
Volgens haar het dit vermoedelik sy lugpyp verstop. Hy het vreeslik aan die stik gegaan. Probeerslae om hom te help het misluk. Hy is toe van Lydenburg per helikopter na die Garden City-hospitaal in Johannesburg geneem, waar hy tans behandel word.
Van Niekerk sê sy en Sarel is sedert die ongeluk elke dag by Ayden. Volgens haar is die dokter tot dusver baie tevrede met sy vordering. Sy sê hulle het vanoggend Ayden gesien beweeg vir die eerste keer in twee weke.
Volgens Van Niekerk is skanderings gedoen en blyk dit op hierdie stadium asof daar nie enige langtermynskade sal wees nie.
