9 Januarie 2023
Die 28-jarige boer van Ficksburg, in die Vrystaat wat doodgeskiet is, is as Evan Sorour geïdentifiseer.
Sorour se buurman is tans onder polisiebewaking by ‘n nabygeleë hospitaal in verband met die voorval.
Volgens die polisiewoordvoerder, adjudant-offisier Mmako Mophiring, het Sorour en sy pa in ‘n woordewisseling met die buurman betrokke geraak oor vee wat na bewering ‘n heining beskadig het.
Sorour is vyf keer deur die buurman geskiet. Volgens Mophiring was Sorour ook gewapen en het hy die verdagte tydens die voorval in die heup getref.
Die polisie het Sorour en sy pa op pad na die hospitaal in ‘n stilstaande motor aangetref. Sorour was toe reeds oorlede.
Die Vrystaatse polisie ondersoek tans ‘n saak van moord, poging tot moord en aanranding met die doel om ernstig te beseer. Mophiring sê die verdagte sal in die Ficksburg-landdroshof verskyn sodra hy herstel het.
