13 Desember 2021
Die Johannesburgse burgemeester, Mpho Phalatse het die name van haar 10 burgemeesterskomitee-lede bekend gemaak. Volgens haar sal hulle binnekort ingehuldig word.
‘n Koalisievennootskap word in die Johannesburg-metro gevolg. Vier van die lede is van die DA, drie is van ActionSA, een is van die IVP asook een lid elk van die VF Plus en die ACDP.
Die burgemeesterskomiteelid vir finansies is Julie Suddaby van die DA en vir groepkorporatiewe en gedeelde dienste is die DA se Leah Knott aangewys. Die DA se lede, Belinda Echeozonjoku is aangewys as die burgemeesterskomiteelid vir ontwikkelingsbeplanning en Michael Sun is weer die lid vir omgewingsake.
Die drie lede van Action SA is Funzela Ngobeni, Nkuli Mbundu en David Thembe. Hulle is onder meer die burgemeesterskomiteelede vir vervoer, ekonomiese-ontikkeling en openbare veiligheid.
Die VF Plus se Franco de Lange sal aan die stuur wees van gesondheid en maatskaplike ontwikkeling en die IVP se Mlungisi Mabaso is by behuising. Ronald Harris van die ACDP is die burgemeesterskomiteelid van gemeenskapsontwikkeling.
