23 Desember 2021
Die Suid-Afrikaanse Reguleringsowerheid vir Gesondheidsprodukte, SAHPRA, het die Johnson &Johnson-versterkingsdosis goedgekeur.
Die reguleerder het ook die groen lig gegee vir diegene wat die Pfizer-entstof ontvang het om die J&J-versterkingsdosis te ontvang, sou hulle wou.
SAHPRA het die aansoek om ’n tweede dosis op 10 Desember van die vervaardigers van die J&J-entstof ontvang.
Diegene wat die J&J-entstof minstens twee maande terug ontvang het mag nou mou oprol vir die versterkingsdosis.
SAHPRA het aan die begin van Desember die groen lig gegee vir ’n derde Pfizer-versterkingsdosis. Pfizer word vanuit die staanspoor in twee dosisse toegedien. Die derde dosis sal beskikbaar gestel word aan diegene ouer as 18 jaar en minstens ses maande nadat die tweede dosis toegedien is.
SAHPRA se aankondiging dat Pfizer en Johnson&Johnson-entstowwe gemeng mag word, word as vordering vir die land se entstofprogram beskou. Die reguleerder was aan die ontvangkant van sterk teenkanting, omdat hy nog nie ’n duidelike standpunt oor die saak ingeneem het nie.
Teen die agtergrond van die Omikron-variant van Covid-19 wat tans die rondte doen, verkeer die regering onder geweldige druk om sy entstofprogram ’n hupstoot te gee, met slegs 35.6% van die land se volwasse bevolking wat ten volle ingeënt is.
Fotokrediet: iStock
