13 Mei 2021
Die liggaam van die jarelange woordvoerder van die Pretoria Dieretuin, Craig Allenby is vanoggend in sy huis gevind.
‘n Goeie vriend van Allenby en kollega in die mediakringe, Phillip Bruwer het aan Pretoria FM bevestig dat sy liggaam vanoggend gevind is. Hy sê die polisie doen ‘n nadoodse ondersoek en meen geen vuilspel word vermoed nie.
Volgens Bruwer was Allenby een van die beste woordvoerders om mee saam te werk. Hy sê Allenby is in 2014 deur die Nasionale Persklub as die woordvoerder van die jaar aangewys.
Die voorsitter van die persklub, Val Boje het in ‘n verklaring gesê dat Allenby talle kontakte in die media gehad het en dat hy altyd beskikbaar was. Sy het haar medelye met sy ma, vriende en kollegas betuig.
Allenby was vir ongeveer 30 jaar werksaam by die Pretoria Dieretuin, maar was ten tye van sy dood ook ‘n direkteur van die Suid-Afrikaanse Nasionale Biodiversiteitsinstituut, oftewel Sanbi.
Bruwer sê sy vriend het ‘n groot passie vir die omgewing gehad en het altyd sy familie en vriende op sy hande gedra.
