27 Julie 2023
Die kaptein van die Jamaikaanse netbalspan, Jhaniele Fowler, beweer dat daar geld uit haar beursie gesteel is én dat iemand toegang tot haar hotelkamer probeer kry het sedert haar aankoms in Suid-Afrika.
Die 34-jarige Fowler het dit op haar Instagram-storie bekend gemaak. Sy het verder aangevoer dat “die plek (Suid-Afrika) nie veilig is nie.”
Sy het aan die DailyMail-nuusblad gesê dat sy gereed is vir die toernooi, ondanks die slegte ervaring.
Netbalspanne van regoor die wêreld is tans in Kaapstad om aan die Wêreldbeker-netbaltoernooi, wat môre (28 Julie) amptelik begin, deel te neem.
Die toernooidirekteur, Priscilla Masisi, sê die polisie het intussen ‘n ondersoek na die beweerde voorvalle van misdaad van stapel gestuur.
