14 April 2021
Oud-president Jacob Zuma het ‘n kort ruk gelede in ‘n verklaring bevestig dat hy nié ‘n eedsverklaring by die Grondwethof gaan indien nie.
Dit kom nadat Zuma tot vanaand om middernag kans gehad het om dié verklaring in dien oor wat hy dink ‘n gepaste vonnis sal wees indien hy skuldig bevind word aan minagting van die hof.
Die Zondo-kommissie van ondersoek na staatskaping het die Grondwethof genader om Zuma tot gevangenisstraf van twee jaar te vonnis nadat hy – ondanks ‘n hofbevel – nié voor die kommissie getuig het nie.
Hoofregter Mogoeng Mogoeng het Zuma verlede week beveel om die eedsverklaring voor of op vandag in te dien en dat dit nie langer as 15 bladsye moet wees nie.
Die oud-president het in ‘n prokureursbrief onder meer gesê dat sy standpunt in hierdie verband nie uit minagting vir die hof of regter Mogoeng is nie, maar dat hy die manier waarop hy behandel is, bevraagteken.
Die Zondo-kommissie en sy voorsitter, adjunk-hoofregter Raymond Zondo sal nou die geleentheid gegee word om te reageer.
