10 Junie 2021
‘n Vrou van Pretoria is rasend van bekommernis nadat haar wit Volkswagen Polo, Dinsdagmiddag gesteel is – mét haar 12-jarige kortbeen-Jack Russel – steeds binne die voertuig.
Madeleen van Niekerk het op haar Facebook-blad ‘n beroep op mense gedoen om op die uitkyk te wees vir Java nadat haar motor (registrasie nommer, HJ26DLGP) omstreeks 13:30 op 8 Junie in die parkeerterrein van die Silverwater Crossing-inkopiesentrum in Meyerspark gesteel is.
Van Niekerk het aan Rekord gesê dat sy beskuit gaan aflewer het by die Pick n Pay, maar dat sy 20 minute later teruggekeer het en agtergekom het dat haar motor gesteel is.
Sy sou ná die stop na kleinhoewe in Boschkop gaan waar sy terapeutiese perdrylesse aanbied.
Volgens Van Niekerk geniet Java dit vreeslik om saam met haar te reis, en meen hy spring selfs op haar skoot wanneer sy perdry. Sy meen sy en Java is onafskeidbaar sedert hy as klein hondjie by die gesin kom bly het. Java is in haar lewe nog voordat haar drie kinders gebore is.
Java se linkeroog moes verlede jaar verwyder word nadat ‘n Mosambiekse spoegkobra hom in sy oog gespoeg het. Van Niekerk sê ‘n kankergewas moes ook vroeër van een van sy voorpote verwyder word, maar meen dié gewas het onlangs teruggekom.
‘n Klag van motordiefstal is by die Silverton-polisie aanhangig gemaak. Van Niekerk het ook tot dusver talle dierewelsynsorganisasies, veeartse, die Dierebeskermingsvereniging en buurtwagte gekontak om Java te probeer vind.
