24 Januarie 2023
Die Tshwane-metro het ‘n dringende versoek gerig aan sy inwoners om hul waterverbruik drasties te verminder, of om meer watertekorte in die gesig te staar.
Die burgemeesterskomiteelid vir nutsdienste, Daryl Johnston sê Rand Water se reservoir kapasiteit het van 60% na 30% gedaal, en is tans op kritieke vlakke wat tot ‘n ineenstorting van die watertoevoer-netwerk kan lei.
Johnston sê beurtkrag lei daartoe dat daar nie genoeg water na die reservoirs gepomp kan word nie, en hoër verbruik is aangemeld te midde van die hittegolf.
LEES OOK: GEBRUIK WATER SPAARSAAM TE MIDDE VAN BEURTKRAG, VRA RANDWATER
Verskeie woonbuurte ervaar reeds watertekorte, waaronder Waterkloof, Monument Park, Grootfontein en Soshanguve.
Intussen het Johannesburg Water gesê hulle wil inwoners van Johannesburg herinner dat vlak-1-waterbeperkings steeds geld.
Waterbeperkings in dié metro is sedert September van krag en sal na verwagting tot aan die einde van Maart geld.
Voortslepende beurtkrag en die hittegolf wat tans in die land heers het ‘n beduidende impak op waterverskaffers se vermoë om water aan inwoners van Gauteng te verskaf. Dít bloot omdat die vraag na water te groot is.
