23 Mei 2023
Wetstoepassers is op ‘n hoë gereedheidsgrondslag nadat inwoners van die Marikana informele nedersetting, naby die Centurion Gautrain-stasie hulle eie huise aan die brand gesteek het.
Volgens die woordvoerder van die nooddienste in die Tshwane-metro, Charles Mabaso word sommige inwoners uit hulle huise gesit, en het hulle weens hulle ontevredenheid met die situasie hulle eie eiendomme aan die brand gesteek.
Hy sê omstanders het die nooddienste ontbied nadat hulle rook en vlamme opgemerk het. Volgens Mabaso is die situasie onder beheer, maar bly hulle op ‘n hoë gereedheidsgrondslag.
Die voorsitter van Lyttelton se sektor 1-gemeenskapspolisiëringsforum, Hugo Erasmus het aan Rekord gesê dat die inwoners uit hulle huise gesit word in opdrag van die polisiehoof in die gebied.
Video: Kamogelo Vega IOL
