Die Suid-Afrikaanse Inkomstediens, die SAID, het ‘n openbare verskoning en vergoeding vir sy werknemers aangebied wat benadeel is deur die kaping van die SAID tussen 2014 en 2018.
Dit sluit amptenare in wat betrokke was by die beweerde geheime ondersoekeenheid.
Dít nadat die Nugent-kommissie van ondersoek na belastingadministrasie en die bestuur van die SAID bevind het dat die integriteit en bestuur van die SAID tydens die vorige kommissaris, Tom Moyane, se ampstermyn misluk het.
Dié ondersoek na die beweerde geheime ondersoekeenheid het bevind dat daar geen grondslag is vir die bewerings teen die personeel wat daarby betrokke was en ander aantygings nie.
Dié eenheid is in 2008 gestig om onwettige ekonomiese bedrywighede op te spoor en te bekamp. Maar daar is beweer dat die eenheid onder Moyane onwettig opgetree het.
