23 Maart 2022
Statistieke Suid-Afrika (SSA), het bekend gemaak dat inflasie vir Februarie op 5,7% bereken is.
Dit is dieselfde koers as wat dit in Januarie was.
Die syfer is laer as wat ontleders voorspel het en die konsensus was dat dit op 5,8% – of hoër – bereken sou word.
Volgens SSA beteken die onveranderde syfer dat die oorlog in Oekraïne nog nie na die plaaslike ekonomie deurgesyfer het nie.
Kerninflasie – wat kos-, brandstof- en kragpryse uitsluit – het ook onveranderd gebly op 3,5%.
In twee provinsies – naamlik die Noord-Kaap en Noordwes – het die inflasiekoers buite die reserwebank se teiken-inflasiekoers gestyg en staan dit op 6,1%.
Kosprysinflasie het met 5,7% gestyg met vleis wat 8,6% duurder is as ‘n jaar gelede en vette en olies wat byna 23% duurder is.
