18 Oktober 2022
Die sokkerstadion in Indonesië, waar minstens 133 mense tydens ‘n stormloop dood is, sal gesloop word.
Die land se president, Joko Widodo sê hulle het besluit om die stadion te sloop en te herbou, as deel van ‘n belofte aan die Sokkervereniging (FIFA) om die sportsoort in Indonesië te transformeer.
LEES OOK: DODETAL STYG VERDER NÁ SOKKER-STORMLOOP
FIFA se hoof, Gianni Infantino het die stadion besoek, enkele weke ná die tragedie. Volgende jaar word die Onder-20 Wêreldbeker-sokkertoernooi in Indonesië gehou.
Woedende aanhangers van Arema FC het op 1 Oktober die veld betree nadat die span verloor het teen Persebaya Surabaya. Polisiebeamptes moes traangas en rubberkoeëls gebruik om toeskouers kalm te maak. Dit het egter tot ‘n stormloop gelei.
LEES OOK: UNIVERSITEIT SLUIT AL SY KAMPUSSE WEENS STORMLOOP VAN STUDENTE
Onder die oorledenes was 40 kinders. Die mees onlangse sterfte is ‘n 33-jarige man, wat in die hospitaal dood is.
Volgens Widodo sal die nuwe stadion se geriewe beter wees en sal spelers en toeskouers veiliger wees. “Ons gaan saam met FIFA werk om te verseker dat die stadion op standaard is.”
