12 April 2023
Sosiale media-gebruikers het die afgelope paar dae met skok en teleurstelling gereageer nadat dit bekend geword het dat die gewilde Funworld-pretpark in Durban sy deure gaan sluit.
Die derde generasie eienaar van die pretpark, Nic Steyn sê sy huurkontrak met die eThekwini-munisipaliteit het in 2017 verstryk, en sedertdien word dit maand tot maand bedryf.
Dié munisipaliteit besit die grond by Durban se Noordstrand waarop die park bedryf word. Dit het in 1938 begin en oor die jare verskillende name gehad, maar word reeds vir 80 jaar deur dieselfde familie besit en bedryf.
Steyn sê weens ‘n stryd met die munisipaliteit is dit onmoontlik om die park aan die gang te hou. Hy sê hy huur die park vir ses maande teen R40 000 per maand, wat beteken dat dit nie noodwendig winsgewend is nie.
Intussen sê die eThekwini-munisipaliteit dat die Funworld-pretpark op 1 Mei vanjaar finaal sy deure gaan sluit. Die munisipaliteit sê in ‘n verklaring dat hul groot planne het vir die grond, en wil die omgewing van Durban se hoofstrand opknap tot ‘n “wêreldklas temapark.”
Die park se pretritte en toerusting sal vanaf 20 April op ‘n aanlyn veiling verkoop word. Die DA in die munisipaliteit het ook ‘n skrywe aan die burgemeester van Durban, Mxolisi Kaunda gerig waarin hulle hom versoek om die park se huurkontrak te verleng.
“Indien die park moet sluit sal dit ‘n groot verlies vir Durban se Noord-strand wees,” sê die raadslid, Sakhile Mngadi.
