19 Januarie 2024
Nelson Mandela se identiteitsdokument gaan deur sy dogter, Makaziwe, opgeveil word ná ‘n twee-jaar-lange hofstryd met die Suid-Afrikaanse Erfenishulpbronagentskap – wat in die hof aangevoer het dat dit as erfenisvoorwerpe bewaar moet word.
Die veiling moes reeds in Januarie 2022 plaasvind, maar is weens die hofstryd uitgestel.
Ingevolge die land se Erfeniswet kan sulke items nie sonder ’n permit uit die land verwyder word nie.
Die ID-boek – wat hy in 1993 ontvang het ná sy vrylating uit die tronk – is onder 69 items wat in Februarie verkoop gaan word ten bate van ‘n gedenktuin.
Die minimum prys vir die ID is geplaas op $75 000, of sowat R1,4-miljoen. Daar word egter verwag dat dit vir soveel as $150 000 of R2,8-miljoen verkoop sal word.
Tekeninge en sketse deur hom asook sy bekende Madiba-hemde sal ook deel wees van volgende maand se veiling, wat deur die Amerikaanse maatskappy, Gurnsey’s aangebied sal word. Selfs sy gehoorstukke word te koop aangebied.
