Die sakeorganisasie, Sakeliga, het ‘n hofaansoek gebring om president Cyril Ramaphosa en sy kabinet te beveel om self die ineengestorte Ditsobotla Plaaslike Munisipaliteit in Lichtenburg reg te ruk.
Die aansoek vorm deel van ’n reeks hofsake deur Sakeliga oor etlike jare, en spruit voort uit ’n hofbevel in Oktober 2023, toe die hof, provinsiale ingryping by Ditsobotla gelas het.
Die regs- en skakelbeampte by Sakeliga, Tian Alberts sê ingevolge artikel 139(5) van die Grondwet is provinsiale ingryping die tweedehoogste vorm van staatsingryping by munisipale verval.
Hy sê omdat die provinsiale owerheid egter misluk het in sy pogings om die munisipaliteit reg te ruk, het Sakeliga nou die hof genader om staatsingryping af te dwing. Sou die aansoek slaag sal dit beteken dat Ramaphosa en sy kabinet self moet verantwoordelikheid aanvaar vir die administratiewe en finansiële herstel van die munisipaliteit.
Ingevolge artikel 139(7) is dit iets wat die president en kabinet eintlik lankal reeds uit hul eie moes doen, maar grof versuim het.
As deel van aansoek vra Sakeliga dat Ramaphosa en sy kabinet al die verantwoordelikhede van ingryping by die provinsiale regering moet oorneem, en self die munisipale herstelplan, wat reeds goedgekeur is, afdwing en uitvoer.
Alberts sê hulle vra verder dat die president dan binne 10 dae aan die hof verslag lewer oor hoe water en kragvoorsiening in Ditsobotla te herstel, die nodige werk binne 30 dae voltooi, en verder in stand hou.
