10 Mei 2022
Die Noord-Gautengse Hooggeregshof in Pretoria het die departement van internasionale betrekkinge en samewerking se aansoek om verlof tot appèl teen ’n interdik wat deur AfriForum bekom is van die hand gewys.
DIE uitspraak verhoed die departement om R50-miljoen aan Kuba te skenk.
AfriForum het die hof se oorspronklike uitspraak verdedig en die aansoek teengestaan op grond daarvan dat die dringende interdik op ’n tydelike grondslag toegestaan is hangende die uitslag van die latere hersieningsaansoek.
Die organisasie het aangevoer dat daar geen rede is om ’n dringende hofbevel te appelleer nie, aangesien die regering die geleentheid sou hê om sy saak tydens die hersieningsaansoek te stel.
AfriForum se veldtogbeampte vir strategie en inhoud, Reiner Duvenage sê dit is onaanvaarbaar vir die regering om geld te verkwis wat tot voordeel van Suid-Afrikan gebruik kan word.
“Tog blyk die regering so desperaat om die broodnodige fondse aan Kuba te skenk dat dit ook aansoeke om verlof tot appèl by die Hoogste Hof van Appèl en die Konstitusionele Hof ingedien het. Vandag se uitspraak versterk egter ons optimisme dat die interdik in die hoër howe bekragtig sal word en dat ons sal slaag met ons hersieningsaansoek om die besluit om die fondse te skenk om te keer,” sê Duvenage.
