10 April 2024
Die Arizona Hooggeregshof in Amerika het beslis dat die staat gehoor móét gee aan die wet op aborsies wat uit 1864 datteer.
Ingevolge die wet is daar ‘n verbod op byna alle aborsies in dié staat. Voorheen is aborsies ná 15 weke van die swangerskap in Arizona verbied. Die hooggeregshof se beslissing van gister beteken egter dat dié 160 jaar oue wet nou weer mag geld.
Vier regters het ten gunste van die herimplementering gestem, teenoor twee regters wat teen dit gestem het. ‘n 2022-hofbeslissing deur die Amerikaanse hooggeregshof het bepaal dat geen vrou ‘n grondwetlike reg op aborsie het nie, en dat elke staat self mag besluit oor hulle aborsie wetgewing.
Gister se bevinding beteken dat Arizona nou een van die Amerikaanse state is met die strengste wette ten opsigte van aborsies. Texas, Alabama en Mississippi is nét so streng.
Arizona se prokureur-generaal, Kris Mayes, wat ‘n demokraat is, het in reaksie op die beslissing gesê dat sy nié ten gunste is van die “drakoniese wet nie” en meen “sy sal géén vrou of dokter ingevolge dié wet vervolg nie.”
Sy sê sy sal nou die beslissing beveg.
Foto: NBC News
